(តូក្យូ)៖ បើតាមការចេញផ្សាយ របស់សារព័ត៌មាន Reuters នៅថ្ងៃអង្គារ ទី២២ ខែមីនា ឆ្នាំ២០២២ រុស្ស៊ី សម្រេចចិត្តដកខ្លួនចេញពីកិច្ចចរចាស្ដីពីសន្ធិសញ្ញាសន្តិភាពជាមួយជប៉ុន និងបានបញ្ឈប់គម្រោងសេដ្ឋកិច្ចរួមគ្នាពាក់ព័ន្ធនឹង ជម្លោះជុំវិញទីប្រជុំកោះគូរីល (Kuril) ជាការឆ្លើយតបទៅនឹងទីក្រុងតូក្យូដែលបានចូលរួមជាមួយសហរដ្ឋអាមេរិក និងសហភាពអឺរ៉ុបដាក់ទណ្ឌកម្ម ប្រឆាំងទីក្រុងម៉ូស្គូ។ រុស្ស៊ី និងជប៉ុន មិនទាន់ចុះហត្ថលេខាផ្លូវការណាមួយជាមួយគ្នាទេ នៅក្រោយបញ្ចប់សង្រ្គាមលោកលើកទី២ដោយសារតែភាពជាប់គាំងលើការ ប្រទាញប្រទង់អះអាងកាន់កាប់ទីប្រជុំកោះគូរីល ដែលបច្ចុប្បន្នស្ថិតនៅក្រោមការគ្រប់គ្រងរបស់រុស្ស៊ី។
ក្រសួងការបរទេសរុស្ស៊ីបាននិយាយថា «នៅក្រោមស្ថានភាពបច្ចុប្បន្ន រុស្ស៊ីមិនមានបំណងបន្តកិច្ចចរចា ជាមួយជប៉ុនលើសន្ធិសញ្ញាសន្តិភាពនោះទេ ដោយសារតែជប៉ុនបានប្រកាន់ជំហរអមិត្តដោយបើកចំហ និងព្យាយាមបំផ្លាញផលប្រយោជន៍នៃ ប្រទេសរបស់យើង»។
លោក Fumio Kishida នាយករដ្ឋមន្ត្រីជប៉ុន បានបង្ហាញការជំទាស់យ៉ាងខ្លាំងទៅនឹងការសម្រេចចិត្តរបស់រុស្ស៊ី ដោយចាត់ទុកថាវាជារឿង អយុត្តិធម៌ និងមិនអាចទទួលយកបានទាំងស្រុង៕