រុស្ស៊ី៖ លោក Dmitry Peskov អ្នកនាំពាក្យវិមានក្រឹមឡាំង បានប្រាប់ឱ្យដឹងកាលពីថ្ងៃអង្គារថា ការប្រើវោហារសាស្ត្រផ្ទាល់ខ្លួនរបស់លោកប្រធានាធិបតីអាមេរិក Joe Biden ទៅកាន់សមភាគីរុស្ស៊ីរបស់លោកគឺលោក Vladimir Putin បានជះផលអវិជ្ជមានដល់ទំនាក់ទំនងរវាងប្រទេសទាំង២ ប៉ុន្តែការសន្ទនារវាងក្រុង Moscow និងក្រុង Washington គឺមានការចាំបាច់ក្នុងចំណុចមួយចំនួន វាជាផលប្រយោជន៍សម្រាប់ពិភពលោកទាំងមូល។
អ្នកនាំពាក្យវិមានក្រឹមឡាំង បានបន្តថា ការប្រមាថកាតទានរឿងផ្ទាល់ខ្លួន មិនអាចជួយអ្វីបានក្រៅតែពីធ្វើឲ្យមានផលប៉ះពាល់ដល់ទំនាក់ទំនងរវាងប្រមុខរដ្ឋទាំង២។ ជាពិសេសការនិយាយប្រមាថរឿងផ្ទាល់ខ្លួន ដែលមិនគួរបណ្ដោយឲ្យមានសង្គ្រាមវោហារសាស្ត្រកើតមានទាល់តែសោះរវាងប្រមុខរដ្ឋទាំង២។
លោកស្រី Kate Bedingfield ប្រធានផ្នែកទំនាក់ទំនងប្រចាំសេតវិមាន បានប្រាប់ឱ្យដឹងផងដែរថា ជំនួបរវាងលោកប្រធានាធិបតីរុស្ស៊ី Vladimir Putin និងសមភាគីអាមេរិកលោក Joe Biden នឹងកើតឡើងបន្ទាប់ពីជម្លោះក្នុងប្រទេសអ៊ុយក្រែនធូរស្បើយហើយនោះ៕