អ៊ុយក្រែន៖ លោក Volodymyr Zelenskyy ប្រធានាធិបតីអ៊ុយក្រែន នៅថ្ងៃព្រហស្បតិ៍ម្សិលមិញ បានអំពាវនាវឱ្យប្រទេសនានា ដាក់ទណ្ឌកម្មតឹងរ៉ឹងបន្ថែមទៀតលើប្រទេសរុស្ស៊ី ក្នុងគោលបំណងដើម្បីព្យាយាមបញ្ចប់សង្គ្រាម។
លោក Zelenskyy បានប្រាប់ឱ្យដឹងថា ទណ្ឌកម្មបច្ចុប្បន្នគឺមិនទាន់គ្រប់គ្រាន់ នូវអ្វីដែលត្រូវការចាំបាច់ដើម្បីបញ្ឈប់រុស្ស៊ី និងបញ្ឈប់សង្គ្រាមនោះទេ។លោកបានអំពាវនាវឲ្យប្រទេសនានាផ្គត់ផ្គង់សព្វាវុធបន្ថែមទៀតដល់អ៊ុយក្រែន ផងដែរ។
កាលពីថ្ងៃព្រហស្បតិ៍ សភាសហរដ្ឋអាមេរិកបានបោះឆ្នោតដើម្បីផ្អាកទំនាក់ទំនងពាណិជ្ជកម្មជាមួយរុស្ស៊ី និងហាមឃាត់ការនាំចូលប្រេងពីរុស្ស៊ី ខណៈដែលសហភាពអឺរ៉ុបបានអនុម័តទណ្ឌកម្មថ្មី រួមមានទាំងបម្រាមហាមឃាត់លើការនាំចូលធ្យូងថ្ម។ មេដឹកនាំអ៊ុយក្រែនបានស្វាគមន៍ ចំពោះការវិលត្រឡប់មកវិញរបស់អ្នកការទូតទួរគី ស្លូវេនី និងប្រទេសលីទុយអានីមកកាន់ទីក្រុងគីវ ដោយអំពាវនាវឱ្យប្រទេសផ្សេងទៀតបើកស្ថានទូតរបស់ពួកគេ ឡើងវិញនៅក្នុងរដ្ឋធានីនេះ៕