ភ្នំពេញ៖ នៅថ្ងៃទី៩ ខែឧសភា ឆ្នាំ២០២២ម្សិលមិញ វេលាម៉ោង១១:៣០នាទីយប់ មានគ្រោះថ្នាក់ចរាចរណ៍មួយបានកើតឡើងរវាងរថយន្តពីរគ្រឿង បណ្តាលឱ្យមនុស្សបីនាក់រងរបួសធ្ងន់ស្រាល ហេតុការណ៍នេះកើតឡើង តាមបណ្តោយផ្លូវបុរីអង្គរ កែងនឹងផ្លូវលេខ១០០៣ ក្នុងសង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
អ្នកនៅក្បែរកន្លែងកើតហេតុ បានប្រាប់ឱ្យដឹងថា មានបុរសម្នាក់បើករថយន្តម៉ាកតូយ៉ូតា RUSH ពណ៌ស ពាក់ស្លាកលេខ ភ្នំពេញ ២BS-០១២៦ បើកបរតាមបណ្តោយផ្លូវលេខ១០០៣ ក្នុងទិសដៅពីលិចទៅកើត ខណៈមកដល់ស្តុបបុរីអង្គរដែលជា ផ្លូវបែកជាបួនស្រាប់តែមានរថយន្តឡង់គ្រីស័រមួយគ្រឿងទៀត ពណ៌ទឹកប្រាក់ពាក់ស្លាកលេខ ភ្នំពេញ ២Q-២១៦៨ បើកដោយបុរសម្នាក់ រួមដំណើរ ជាមួយនិងមនុស្សពីរនាក់ទៀតក្នុងទិសដៅពីជើងទៅត្បូង បើកក្នុងល្បឿនលឿន ជាន់ហ្វ្រាំងមិនទាន់ ក៏ជ្រុលទៅបុកជាមួយរថយន្តតូយ៉ូតា RUSH ពេញទំហឹង បណ្តាលអោយជ្រុលចង្កូត ធ្លាក់ចូលទៅក្នុងប្រឡាយទឹកស្អុយ។ ក្នុងពេលនោះដែរ ប្រជាពលរដ្ឋនៅជិតកន្លែងកើតហេតុបានចុះទៅជួយអ្នកបើករថយន្ត និងអ្នករួមដំណើរឡើងមកលើគោក រួចទាក់ទងទៅរថយន្តសាមុយ ដឹកយកទៅសង្គ្រោះបន្ទាន់ភ្លាមៗ។
សមត្ថកិច្ច បានឱ្យដឹងថា បន្ទាប់ពីកើតហេតុ ដោយភាគីទាំងសងខាង សម្រួលគ្នាមិនត្រូវ ទើបសមត្ថកិច្ចមូលដ្ឋានសហការ ជាមួយសមត្ថកិច្ចជំនាញចរាចរណ៍ ចុះមកដល់វាស់វែងស្ទូចយករថយន្តទាំងពីរគ្រឿង ទៅរក្សាទុកនៅខាងការិយាល័យចរាចរណ៍ជំនាញផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយផងដែរ៕