(ស៊ីដនី)៖ នៅថ្ងៃសុក្រ ខែមិថុនា ឆ្នាំ២០២២នេះ លោក អាន់ថូនី អាល់បានីស (Anthony Albanese) នាយករដ្ឋមន្ត្រីអូស្ត្រាលី បានប្រាប់ឱ្យដឹងថា លោកនឹងទៅចូលរួម កិច្ចប្រជុំដ៏សំខាន់មួយរបស់បក្សសម្ព័ន្ធយោធា NATO ក្នុងទីក្រុងម៉ាឌ្រីដ ប្រទេសអេស្ប៉ាញ នៅចុងខែមិថុនានេះ ខណៈសហរដ្ឋអាមេរិកកំពុងព្យាយាម ពង្រឹងទំនាក់ទំនង និងប្រមូលកម្លាំងសម្ព័ន្ធមិត្តដើម្បីឆ្លើយតបទៅនឹងសង្រ្គាមរបស់រុស្ស៉ី នៅអ៊ុយក្រែន។
លោក អាន់ថូនី អាល់បានីស បានថ្លែងប្រាប់អ្នកសារព័ត៌មានថា «ខ្ញុំនឹងទៅចូលរួមកិច្ចប្រជុំ NATO ជាអាទិភាព…ដើម្បីបង្ហាញ ការគាំទ្រដល់ប្រជាជនអ៊ុយក្រែន ប្រឆាំងនឹងការឈ្លានពានរបស់រុស្ស៉ី»។
សូមបញ្ចាក់ថា អូស្ត្រាលីដែលមិនមែនជាសមាជិក NATO ក៏បានផ្ដល់ការគាំទ្រដល់អ៊ុយក្រែនផងដែរ ក្នុងនោះរួមមានទាំងការបញ្ជូនជំនួយមនុស្សធម៌ និងបរិក្ខារយោធាមួយចំនួន ព្រមទាំងចូលរួមដាក់ទណ្ឌកម្មសេដ្ឋកិច្ចប្រឆាំងនឹងទីក្រុងមូស្គូ៕