ប៉ៃលិន៖ កាលពីវេលាម៉ោង១៨៖២០នាទីព្រលប់ថ្ងៃទី១៥ ខែកក្កដា ឆ្នាំ២០២២ ផ្ទះចំនួន ០៣ខ្នង ត្រូវបានអគ្គិភ័យឆាបឆេះគ្មានសល់ បង្កការភ្ញាក់ផ្អើលដល់សមត្ថកិច្ច និងអាជ្ញាធរមូលដ្ឋាន ហេតុការណ៍នេះកើតឡើងតាមបណ្តោយផ្លូវជាតិលេខ៥៧ ស្ថិតក្នុងភូមិផ្សារព្រំត្បូង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីកន្លែងកើតហេតុ បានប្រាប់ឱ្យដឹងថា ដំបូងគេឃើញអណ្តាតភ្លើងឆេះចេញពីផ្ទះអ្នកលក់ចាប់ហ៊ួយមួយកន្លែងឈ្មោះ ឈីម ស្រីធំ ភេទស្រី អាយុ២១ឆ្នាំ ព្រមទាំងមានសំឡេងផ្ទុះ សង្ស័យជាការផ្ទុះធុងហ្គាស រួចក៏បន្តឆេះរាលដាល ផ្ទះចំនួន២ខ្នងទៀត។ សមត្ថកិច្ចជំនាញគ្រប់គ្រងស្ថានភាពបានពន្លត់ជាស្ថាពរ ដោយប្រើទឹករថយន្តពន្លត់អគ្គីភ័យ អស់ ចំនួន ៣គ្រឿង។
នាយប៉ុស្ត៍រដ្ឋបាលឃុំស្ទឹងកាច់ លោក ស៊ឹម សុផល បាននិយាយថា មូលហេតុនៃការឆាបឆេះបណ្ដាលមកពីឆ្លងចរន្តអគ្គិសនី រួចក៏ឆេះឆ្លងផ្ទុះហ្គាសបណ្ដាលឲ្យរាលឆេះដល់ផ្ទះចំនួនពីរថែម ទៀត៕