សហភាពអឺរ៉ុប៖ កាលពីថ្ងៃពុធម្សិលមិញ សហភាពអឺរ៉ុបបានប្រាប់រដ្ឋសមាជិក ឱ្យកាត់បន្ថយការប្រើប្រាស់ឧស្ម័នឲ្យបាន 15% រហូតដល់ខែមីនា ឆ្នាំ២០២៣ ដែលជាផ្នែកនៃផែនការគ្រាអាសន្ន បន្ទាប់ពីប្រធានាធិបតីរុស្ស៊ីលោក Vladimir Putin បានព្រមានថា ការផ្គត់ផ្គង់ដែលបញ្ជូនទៅអឺរ៉ុបអាចត្រូវបានកាត់បន្ថយបន្ថែមទៀត។
នៅថ្ងៃព្រហស្បតិ៍នេះ ការដឹកជញ្ជូនតាមបំពង់បង្ហូរឧស្ម័ន Nord Stream 1 គ្រោងនឹងដំណើរការជាថ្មី បន្ទាប់ពីការផ្អាកដល់ដើម្បីជួសជុលរយៈពេល ១០ថ្ងៃ។ បណ្ដាញនេះមានច្រើនជាងមួយភាគបីនៃការនាំចេញឧស្ម័នរបស់រុស្ស៊ីទៅកាន់សហភាពអឺរ៉ុប។ ការផ្គត់ផ្គង់តាមរយៈ Nord Stream 1 ត្រូវបានកាត់បន្ថយមុនពេលការជួសជុលប្រចាំឆ្នាំ ដោយសារជម្លោះជុំវិញការដាក់ទណ្ឌកម្ម ហើយឥឡូវនេះអាចត្រូវបានកាត់បន្ថយបន្ថែមទៀត។ លំហូរឧស្ម័នតាមរយៈផ្លូវផ្សេងទៀតដូចជាអ៊ុយក្រែនក៏បានធ្លាក់ចុះផងដែរ ចាប់តាំងពីការវាយលុករបស់រុស្ស៊ីកាលពីខែកុម្ភៈ។
គណៈកម្មការអឺរ៉ុបបានស្នើគោលដៅស្ម័គ្រចិត្ត សម្រាប់រដ្ឋជាសមាជិកទាំងអស់កាត់បន្ថយការប្រើប្រាស់ឧស្ម័នឲ្យបាន 15% ចាប់ពីខែសីហាដល់ខែមីនា ឆ្នាំ២០២៣ ខាងមុខ បើធៀបនឹងការប្រើប្រាស់ជាមធ្យមរបស់ពួកគេក្នុងរយៈពេលដូចគ្នា៕